انسحاب

ذكريات ممتعه فعلا كل الناس عندها ذكريات ممتعه انا عايزة افتكر معاكم حبه ذكريات ممتعه رغم بساتطها نفسنا ترجع تانى ونعشها بكل مافيها .

ذكرياتى ابيض واسود .

كان زمان فى ذاكرتى الشكل ابيض واسود زى التليفزيون زمان يعنى الجيل الحديث مش هيقدر يتخيل معانا وممكن يستغرب ويحس ان ازى نعيش من غير موبيل او نت  بس كنا عايشين ومستمتعين جدا كمان .

ارجع تانى وافتكر ذكرياتى كان وقت الاكل لازم ناكل مع بعض على الطبليه مافيش حاجه اسمها كل واحد ياكل مع نفسه .

 

انا كمان كنت قديمه شويه يعنى مكنش عندنا تليفزيون فى بدايه الطفوله وكان الكل كدة او اغلابيه الناس كدة دة كمان كان فيه ناس ماكنش عندها راديو وكان كل الاطفال ڜاغل دماغها ازى فيه ناس  اعدة جوة الراديو الصغير دة .

 انا فاكرة فى رمضان كنا بنفطر فى صمت وترقب عشان متابعين برامج ومسلسلات وفوازير كمان فى الراديو تخيلو اة والله .

 وبعدين الراديو دة كنا بنحترمه كان محطوط على رف عالى يعنى كنت بطلع على الكنبه علشان ااقدر احول الراديو وكمان كان ليه مفرش ابيض مشغول يدوى گنا فخورين ان عندنا راديو .

وابور الجاز .

وكنا فى الشتا نولع بابور الجاز ونعقد حواليه ونحكى ونهزر وستى تحكى اجمل الحواديت وتحكى عن ذكرياتها ونضحك ونبقى مبسوطين اوى مع حبه سودانى وبرتقال ويسلام لو عودين قصب والكبار يشربو شاى كان زمان مينفعش الاطفال تشرب شاى .

  اكيد شباب كتير متعرفش يعنى ايه وابور الجاز دة كان اجمل اختراع حاجه شبيهه بالبوتجاز صغيرة بعين واحدة كنا نطبخ عليه والله وكان صوتو جميل نولعه بليل وندفى عليه فى الفسحه اللى هى اسمها دلوقتى الريسبشن .

 حتى لما جه التليفزيون كان بيشطب بدرى مكنش فيه سهر كنا ننام ونصحى بدرى عشان كدة مكنش فيه الامراض الموجودة دلوقتى .

انا فاكرة برنامج العلم والايمان ، وبرنامج عالم الحيوان ، وعالم السيرك كنت بحبهم ااوى

نرجع لذكرياتنا لما كنا نروح المدرسه كانت لازم الجزمه مش كوتش لاء جزمه سودة بابزيم  ولازم تدهن بالورنيش وشراب ابيض و2 منديل يد قماش وشرايط بيضه للشعر والشنطه القماش اللى فايض من المريله تيل ناديه والله اخر شياكه .

كنا بنقعد مع الاهل والاخوات اكتر وكان الضحك اكتر ويسلام بقى على رمضان وجمال رمضان كنا بنعمل زينه رمضان على ايدينا بورق الكرسات وميه ونشا وحبل .

فى وقفه العيد كنا نجيب ورق الجرايد او نصرف بقى ونبعزق نشترى ورق جلاد ونعمله مثلثات ونحط فى النمليه وعلى تربيزة المطبخ احتفال بالعيد وكل واحد ينايم طقم العيد جمبه على السرير .

يوم العيد نصحى بدرى ناخد العديه ونحطها فى الشنطه مع المنديل القماش ونلعب حبه فى الشارع ونخرج لزيارة الاهل يوم هما يجو ويوم احنا نروح  .

والعديه ياخدو جزء منها الاهل يعملو تبادل عديات بين العيال .

احلا ايام .

 والله كانت ايام جميله واجمل مافيها الناس فاضيه لبعض بيسمعو بعض فيه حوار وكلام

  دلوقتى الكل قاعد مع بعض وكل واحد فى العالم الافتراضى بتاعه فى الموبيل ولو سبت الموبيل مش بتلاقى حوار لغه الحوار خلصت مع الزمن الجميل زمن الروقان .

الروقان فى  كل حاجه فى الاغانى والحياة والموصلات دلوقتى زمن الالوان والزحمه والازعاج وفى نفس الوقت كل واحد مع نفسه 

زمان مكنش حد يعرف يعنى ايه دور رعايه او يعنى ايه دار مسنين زمنا برغم البساطه الماديه بس فى سعادة من القلب وكان فيه احساس بالامان والوفاء .